राज्यद्वारा प्रवाहित सेवा प्रतिको आक्रोश, वितृष्णा र दिक्कको विस्फोट जेन्जी आन्दोलन : स्वास्थ्य मन्त्री डा.सुधा शर्मा

काठमाडौँ – पछिल्लो समय देखिएको जेन्जी आन्दोलनको मूल कारण राज्यद्वारा प्रवाहित सेवा प्रतिको आक्रोश, वितृष्णा र दिक्कको अवस्था रहेको उल्लेख गर्दै स्वास्थ्य मन्त्री सुधा शर्माले त्यस प्रकारको संकट भोलि नदोहोरियोस् भन्ने प्रमुख लक्ष्य सहित सुधारको आवश्यकता औंल्याएकी छन्।

स्वास्थ्य मन्त्रालयद्वारा शुक्रबार आयोजित राष्ट्रिय संयुक्त वार्षिक समीक्षा २०८१/८२ को उद्घाटन सत्रमा बोल्दै उनले उपलब्ध स्रोत साधनलाई समय मै र प्रभावकारी रूपमा प्रयोग नगर्दा जनतामा छटपटी बढेर विस्फोटको अवस्था सिर्जना भएको बताइन्।

उनका अनुसार, ‘हामीले भएका स्रोत साधनको प्रयोग गरेर अझ राम्रो गर्न सक्थ्यौँ। नगर्दा के हुन्छ भने मान्छेको आक्रोश, दिक्क, के गर्ने भन्ने छटपटी भएर विस्फोट भयो नि हाम्रो देशमा। त्यो हामीले शिक्षा रुपमा लिनु पर्छ।’

मन्त्री शर्माले विगतको अवस्था सँग तुलना गर्दै स्वास्थ्य क्षेत्रमा धेरै प्रगति भएको पनि उल्लेख गरिन्। उनका शब्दमा, सामान्य औषधि नपाउने र आधारभूत परीक्षणका लागि विदेश जानुपर्ने स्थिति समाप्त भएको छ, अहिले अधिकांश उपचार नेपालमै हुने व्यवस्था बनेको छ। वार्षिक रूपमा ठूलो संख्यामा स्वास्थ्य जनशक्ति उत्पादन हुने अवस्थालाई पनि उनले सकारात्मक उपलब्धि बताइन्।

तर प्रगति सँगै चुनौती थपिएको उल्लेख गर्दै उनले स्वास्थ्य संस्थामा हुने घटनाका कारण गम्भीर समीक्षा आवश्यक भएको बताइन्। ‘चिकित्सकहरू भगवान होइनन्, मृत्यु हुने घटना विकसित देशमै पनि हुन्छ,’  उनले भनिन्, ‘महत्वपूर्ण कुरा किन भयो भन्ने हो। समयमै उपचार नपुगेका, कमी कमजोरी वा प्रणालीगत कारणहरू पहिचान गर्नुपर्छ।’

स्वास्थ्य प्रति जनचेतना बढे सँगै उपचार सम्बन्धी विवाद न्यायालय सम्म पुग्ने क्रम बढेको बताउँदै मन्त्री शर्माले स्वास्थ्यकर्मी अझ चनाखो र जिम्मेवारीपूर्वक काम गर्नुपर्नेमा जोड दिइन्। ‘अब हामीले आफ्नो कामलाई एकदमै सिरियसली लिनु पर्यो,’ उनले भनिन्।

स्वास्थ्य मन्त्रालयमा लामो अन्तराल पछि पुनः फर्किएको उल्लेख गर्दै मन्त्री शर्माले विगतमा स्वास्थ्य क्षेत्रमा देखिएका बेथिति अन्त्य गर्ने आफ्नो प्रतिवद्धता दोहोर्याइन्।