कार्डियक सर्जन डा. ग्रैडलिन रोयको ३९ वर्ष मै हृदयघातबाट निधन, चिकित्सक माझ किन बढ्दैछ अचानक कार्डियक अरेस्ट?

नयाँ दिल्ली (ब्युरो)– स्वास्थ्य क्षेत्रका लागि दुःखद खबर आएको छ। चेन्नईका कार्डियक सर्जन डा. ग्रैडलिन रोयको मात्र ३९ वर्षको उमेरमा हृदयघातका कारण निधन भएको छ। हरेक दिन सयौँ बिरामीको मुटु उपचार गर्ने डा. रोय आफैं अचानक मुटुको रोगको शिकार बने।

डा. रोय चेन्नई स्थित सेवाथा मेडिकल कलेजमा कन्सल्टेन्ट कार्डियक सर्जनका रूपमा कार्यरत थिए । गत बुधबार बिहान अस्पतालमा राउन्ड लिँदै गर्दा अचानक स्वास्थ्य बिग्रिएर उनी ढले । तत्कालै सहकर्मी चिकित्सकहरूले सिपीआर, आपतकालीन एन्जियोप्लास्टी, स्टेन्टिङ देखि एक्मो (इसीएमओ)  जस्ता आधुनिक उपचारका सबै प्रयास गरे पनि उनको जीवन बचाउन सकिएन ।

किन बढ्दो चिन्ता?

हैदराबादका न्युरोलोजिस्ट डा. सुधीर कुमारले सामाजिक सञ्जाल एक्स मार्फत लेखेका छन्, ‘डा. रोयको मृत्यु कुनै एक्लो घटना होइन। पछिल्ला केही वर्षयता युवा चिकित्सक तथा स्वास्थ्यकर्मीहरूमा अचानक हृदयाघात र कार्डियक अरेस्टका घटना बढ्दै गएका छन्।’

सन २०२३ जुन महिनामा जामनगरका प्रख्यात हृदय रोग विशेषज्ञ डा. गौरव गान्धीको ४१ वर्षको उमेरमा कार्डियक अरेस्टका कारण निधन भएको थियो। यस्तै घटना भारतका अन्य युवा चिकित्सकहरूमा पनि देखिँदै आएको छ, कतिपय ड्युटी कै क्रममा ढलेका छन् ।

डा. ग्रैडलिन रोयको असामयिक निधनले फेरि एक पटक गम्भीर प्रश्न खडा गरेको छ ।  किन युवा चिकित्सक र स्वास्थ्यकर्मीहरू मै हृदयघात र कार्डियक अरेस्टका घटना तीव्र गतिमा बढ्दैछन् ? अरूको जीवन बचाउने यी ‘जीवनदाता’ हरूले आफ्नै स्वास्थ्य र मानसिक सन्तुलनमा ध्यान दिन अब अत्यावश्यक भएको छ। विशेषज्ञहरूको भनाइ अनुसार, चिकित्सकहरूको जीवन शैली स्वयं स्वास्थ्यका लागि खतरनाक बन्दै गएको छ ।

कस्तो छ डाक्टरको जीवनशैली ?

• निरन्तर १२–१८ घण्टासम्म काम गर्नुपर्ने, कति पय अवस्थामा २४ घण्टा भन्दा लामो ड्युटी।
• जीवन मृत्युसँग सम्बन्धित निर्णय र कानुनी जिम्मेवारीले सिर्जना गर्ने अतिरिक्त दबाब।
• व्यस्त दिनचर्याका कारण पौष्टिक आहार, पर्याप्त निद्रा र व्यक्तिगत हेरचाहको कमी।
• व्यायाम र नियमित स्वास्थ्य परीक्षणलाई उपेक्षा ।
• मानसिक स्वास्थ्य बारे खुला छलफल नहुँदा बर्न आउट र डिप्रेसन जस्ता गम्भीर समस्या बेवास्ता हुने।