सातै प्रदेशमा रेबिज विरुद्धका ५१,१८० भायल खोप, सर्पदंश उपचार औषधी पनि आपूर्ति

काठमाडौं – स्वास्थ्य तथा जनसंख्या मन्त्रालय अन्तर्गतको स्वास्थ्य सेवा विभागले रेबिज विरुद्ध को खोप र सर्पदंश उपचारका लागि आवश्यक औषधी सातै प्रदेशमा आपूर्ति गरेको छ।

विभागको व्यवस्थापन महाशाखा प्रमुख डा. पवनजंग रायमाझीका अनुसार यसअघि खरिद भइसकेका औषधीहरू प्रदेशका स्वास्थ्य संस्थामा वितरण गर्नका लागि प्रदेश आपूर्ति केन्द्रहरूमा पुर्‍याइएका छन्।

हालै रेबिज र सर्पदंश उपचारका औषधी अभाव देखिए पछि स्वास्थ्य मन्त्री प्रदीप पौडेलले तत्काल आपूर्ति सुनिश्चित गर्न निर्देशन दिएका थिए। उनले आपूर्ति प्रक्रियामा गति ल्याई भविष्यमा अभाव हुन नदिन आवश्यक कदम चाल्न अधिकारीलाई आह्वान गरेका थिए।

विभागले उपलब्ध गराएको तथ्यांक अनुसार हालसम्म ५१ हजार १८० भायल रेबिज विरुद्धको खोप प्रदेश आपूर्ति केन्द्रहरूमा पुगेका छन्।

सबै भन्दा बढी आपूर्ति बाग्मती प्रदेशमा गरिएको छ, जहाँ १० हजार ८० भायल रेबिज खोप र १ हजार भायल सर्पदंश विरुद्धको भेनम पुगेको विभागले जनाएको छ।

त्यस्तै, सर्पदंशको उच्च जोखिम रहेको मधेश प्रदेशमा करिब ५ हजार भायल रेबिज खोप र २५०० भायल भेनम आपूर्ति गरिएको छ।

मन्त्रालयका प्रवक्ता डा. प्रकाश बुढाथोकीका अनुसार माग र आवश्यकता अनुसार अन्य प्रदेशहरूमा पनि खोप र भेनम वितरण गरिएको छ।

यसै बीच, विभागले हाल आपूर्ति भएको मात्रामा सीमित नराखी आगामी दुई महिना भित्र हाल उपलब्ध गराइएको भन्दा करिब चार गुणा बढी आपूर्ति हुने व्यवस्था मिलाएको जनाएको छ।