मुटुको स्वास्थ्यका लागि फाइदाजनक कफी : नयाँ अध्ययनले देखायो चकित पार्ने नतिजा

हालै गरिएको एक अध्ययनले कफी केवल थकान हटाउने पेय मात्र नभई मुटुको स्वास्थ्यका लागि पनि फाइदाजनक हुन सक्ने तथ्य उजागर गरेको छ । यो अनुसन्धान अमेरिकाको युनिभर्सिटी अफ क्यालिफोर्निया, सान फ्रान्सिस्को (युसिएसएफ)  र अष्ट्रेलियाको युनिभर्सिटी अफ एडिलेड का वैज्ञानिकहरूले गरेका हुन् । जसको नतिजा जामा नेटवर्क  जर्नलमा प्रकाशित भएको छ र यसलाई यहाँ क्लिक गरेर पढ्न सकिन्छ।

अध्ययन अनुसार, सीमित मात्रामा कफी सेवन गर्दा मुटुको धड्कन सन्तुलनमा रहन्छ र एट्रियल फाइब्रिलेसन (ए-फाइब) अर्थात् मुटुको अनियमित धड्कनको जोखिम घट्छ।

कफी र मुटुको सम्बन्धबारे पहिलो विस्तृत अध्ययन

डेकाफ  (के कफी हटाउनाले फाइब्रिलेसनबाट बच्न सकिन्छ?)’ नामको यो अध्ययनले कफी र एट्रियल फाइब्रिलेसन बीचको सम्बन्ध बारे विस्तृत अनुसन्धान गरेको पहिलो प्रयास हो । यसमा २०० जना बिरामी सहभागी थिए, जसलाई पहिले नै मुटुको अनियमित धड्कनको समस्या थियो र ‘इलेक्ट्रिकल कार्डियोभर्जन’ नामक उपचार हुँदै थियो।

उनीहरूलाई दुई समूहमा विभाजन गरिएको थियो । एक समूहले दैनिक कम्तीमा एक कप कैफिन युक्त कफी वा एस्प्रेसो पिउन अनुमति पायो, जबकि अर्को समूहलाई कैफिन युक्त पेय पूर्ण रूपमा बन्द गर्न भनियो। छ महिना पछि पत्ता लाग्यो कि नियमित रूपमा कफी सेवन गर्ने व्यक्तिहरूमा एट्रियल फाइब्रिलेसन पुनः देखा पर्ने सम्भावना झण्डै ३९ प्रतिशतले कम थियो।

किन फाइदाजनक छ कफी?

अनुसन्धानका वरिष्ठ लेखक डा. ग्रेगरी एम. मार्कसका अनुसार, कफीले शारीरिक सक्रियता बढाउँछ, जसले मुटुलाई बलियो बनाउँछ। कैफिन शरीरबाट अतिरिक्त पानी निकाल्न सहयोग गर्ने ‘डायुरेटिक’ गुण भएको पदार्थ हो, जसले रक्तचाप सन्तुलनमा राख्न मद्दत गर्छ।

साथै, कफीमा पाइने एन्टि इन्फ्लेमेटरी तत्वले मुटुका कोषहरूलाई स्वस्थ राख्न सहयोग पुर्‍याउँछ। कफी पिउने मानिसहरूले प्रायः चिनी तथा प्रशोधित पेय पदार्थहरू कम सेवन गर्ने भएकाले पनि मुटुको स्वास्थ्यमा अतिरिक्त लाभ देखिन्छ।

संक्षेपमा, नयाँ अध्ययनले देखाएको छ कि सीमित मात्रामा कफी पिउनु केवल स्फूर्तिका लागि नभई मुटुको दीर्घकालीन स्वास्थ्यका लागि पनि लाभदायक हुन सक्छ।