जंक फुडबाट हुने डिप्रेसन घटाउन व्यायाम प्रभावकारी

जंक फुडको बढी सेवनले मानसिक स्वास्थ्यमा पर्ने नकारात्मक असरलाई नियमित व्यायामले कम गर्न सकिने नयाँ अध्ययनले देखाएको  आयरल्यान्डको युनिभर्सिटी कलेज कर्कका अनुसन्धानकर्ताहरूले पत्ता लगाएका छन् कि दौडिने, पौडी खेल्ने वा साइकल चलाउने जस्ता कार्डियो व्यायामहरूले जंक फुडका कारण देखिने अवसाद (डिप्रेसन) का लक्षणहरूलाई नियन्त्रण गर्न मद्दत पुर्‍याउँछन्।

अनुसन्धान कर्ताहरूले ती विशेष मेटाबोलिक मार्गहरू पहिचान गरेका छन्, जसका माध्यमबाट व्यायामले पश्चिमी शैलीका उच्च बोसो र बढी चिनी भएका आहारका कारण हुने नकारात्मक व्यवहारिक असरहरूलाई न्यूनीकरण गर्छ।

अध्ययनसँग सम्बद्ध प्रा. याभोन नोलानका अनुसार,’दौड जस्ता नियमित शारीरिक क्रियाकलापहरूले उच्च बोसो र बढी चिनी भएको खानेकुराबाट उत्पन्न अवसाद जस्ता व्यवहार घटाउँछन्।’

यो अध्ययन ‘ब्रेन मेडिसिन’ नामक जर्नलमा प्रकाशित भएको हो जसलाई यहाँ क्लिक गरेर पढ्न सकिन्छ। अनुसन्धानका क्रममा वयस्क नर मुसालाई उच्च बोसो र बढी चिनी भएको ‘क्याफेटेरिया डाइट’ खुवाइएको थियो। ती मध्ये आधा मुसालाई दौड्ने पाङ्ग्रा प्रयोग गर्न दिइएको थियो।

परिणाममा देखियो कि यस्तो आहारले मुसाको आन्द्रामा रहेका मेटाबोलाइटहरूमा ठूलो परिवर्तन ल्यायो, जसमा निष्क्रिय मुसाहरूमा मापन गरिएका १७५ मध्ये १०० मेटाबोलाइट प्रभावित भएका थिए।

अनुसन्धान टोलीको निष्कर्ष अनुसार, नियमित शारीरिक गतिविधि पश्चिमी शैलीका खानेकुरा खाने मानिसहरूका लागि पनि लाभदायी हुन्छ। व्यायामले आहारको प्रकार भन्दा स्वतन्त्र रूपमा हल्का ‘चिन्ता घटाउने’ प्रभाव पनि देखाएको छ।