डा. गोविन्द केसी ले सुरु गरे सत्याग्रह, निजी मेडिकल कलेजको सिट वृद्धि फिर्ता मुख्य माग

काठमाडौं – चिकित्सा शिक्षा र सेवा सुधार अभियन्ता प्रा.डा.गोविन्द केसीले निजी मेडिकल कलेजमा सिट वृद्धि गर्ने हालैको निर्णय तत्काल फिर्ता गर्न माग गर्दै  आइतबार देखि सत्याग्रह सुरु गरेका छन्। उनले कैलाली स्थित गेटाको सहिद दशरथ चन्द्र स्वास्थ्य विज्ञान विश्वविद्यालय प्रतिष्ठानमा २३ औं सत्याग्रह सुरु गरेका हुन् ।

डा.केसीले विज्ञप्ति जारी  गर्दै तीन दिने सत्याग्रह सुरु गरेको जनाएका हुन् ।  विज्ञप्तिमा करिब दुई दशक देखि गुणस्तरीय, नि:शुल्क तथा सस्तो शिक्षा र स्वास्थ्य सेवामा सबैको समान पहुँच सुनिश्चित गर्न संघर्षरत रहेको स्मरण गराउँदै, चिकित्सा शिक्षा ऐनकाे मर्म विपरीत सरकारले लिएको पछिल्लो निर्णयले गुणस्तरमा गम्भीर आघात पुगेको बताएका छन्।

डा. केसीले प्रधानमन्त्री केपी शर्मा ओलीको ‘नाजायज प्रत्यक्ष हस्तक्षेप’ का कारण चिकित्सा शिक्षा आयोगले गैर जिम्मेवार ढंगले निजी मेडिकल कलेजको सिट बढाएको आरोप लगाएका छन्। उनका अनुसार, ‘नेता र माफियाको झोला त भरिन्छ तर शिक्षाको गुण स्तर खस्कँदा अन्ततः आम जनताको स्वास्थ्य सेवामा प्रत्यक्ष असर पर्छ।’

उनले सरकारले विभिन्न सम्झौता गरे पनि इलाम, उदयपुर र डडेलधुरामा सरकारी मेडिकल कलेज तथा अस्पताल सञ्चालन नगरेको, कैलालीको गेटामा पाँच वर्ष अघि निर्माण सम्पन्न भए पनि सेवा सुरु नगरिएको प्रति आपत्ति जनाए।

त्रिवि शिक्षण अस्पतालले पूर्वाधार अभावका कारण १०० एमबीबीएस विद्यार्थी पढाउन हिचकिचाइ रहेको अवस्थामा आधारभूत संरचना र बिरामीको चाप अत्यन्त न्यून रहेका निजी मेडिकल कलेजलाई १३० सिट दिने निर्णयलाई उनले ‘दुर्भाग्यपूर्ण’ भनेका छन्। ‘नेताहरू आफ्नै स्वार्थका लागि आम नेपालीको स्वास्थ्यमा खेलबाड गरिरहेका छन्,’ विज्ञप्तिमा भनिएको छ।

उनले भनेका छन्, ‘गलत निर्णयले शिक्षा र स्वास्थ्यको गुणस्तर खस्किने मात्र होइन, आम नेपालीको स्वास्थ्यमा दीर्घकालीन नकारात्मक असर पर्छ।’

यस्तै डा. केसीले चीन– भारत बीच लिपुलेक हुँदै व्यापार गर्ने समझदारीलाई ‘सीमा मिचाइ’ भन्दै विरोध जनाएका छन्। साथै, उनले रुसद्वारा युक्रेन माथि गरिएको आक्रमण, इजरायलको गाजा आक्रमण तथा त्यस मार्फत भएका ‘मानव विरुद्धका अपराध र जातीय सफायाको अभ्यास’ को पनि विरोध गर्दै यस्ता युद्ध तत्काल रोक्न माग गरेका छन्।

सत्याग्रहका मुख्य मागहरु

• निजी मेडिकल कलेजको सिट वृद्धि फिर्ता गर्ने ।
• इलाम, उदयपुर र डडेलधुरामा सरकारी मेडिकल कलेज तथा अस्पताल खोल्ने ।
• कैलालीको गेटामा शैक्षिक कार्यक्रम र अस्पताल सेवा तुरुन्त सुरु गर्ने ।
• यसअघि भएका सम्झौताहरू (प्रतिष्ठान ऐन, उच्च शिक्षा ऐन, दरबन्दी सम्बन्धी निर्णयहरू) कार्यान्वयन गर्ने ।