नेपाल फार्मेसी काउन्सिलद्वारा ‘गुड फार्मेसी प्राक्टिस’ तालिम र ‘रोस्टर ट्रेनर्स’का लागि आवेदन आह्वान

काठमाडौं – नेपाल फार्मेसी काउन्सिलले ‘गुड फार्मेसी प्राक्टिस’ (जिपीपी) तालिममा सहभागी हुन फार्मासिस्ट तथा सहायक फार्मासिस्टहरूलाई आवेदन दिन आह्वान गरेको छ।

काउन्सिलका रजिस्टार सञ्जीव कुमार पाण्डेको अनुसार आगामी आर्थिक वर्ष २०८२/०८३ मा सञ्चालन हुने यस तालिमको उद्देश्य सामुदायिक तथा अस्पताल फार्मेसी सेवामा सुरक्षित, प्रभावकारी र नैतिक सेवाप्रदानका लागि व्यावसायिक ज्ञान, सीप र दक्षता सुदृढ बनाउनु रहेको छ।

जीपीपी तालिममा आवेदन दिन इच्छुक व्यक्तिहरू नेपाल फार्मेसी काउन्सिलमा दर्ता भएको फार्मासिस्ट वा सहायक फार्मासिस्ट हुनु पर्नेछ। साथै, हाल अस्पताल वा सामुदायिक फार्मेसीमा कार्यरत हुनु आवश्यक शर्त रहेको छ।

आवेदनमा उम्मेदवारको नाम, शैक्षिक योग्यता, कार्यरत संस्था, अस्पताल वा सामुदायिक फार्मेसीमा अनुभव, तालिम लिनुको प्रेरणा तथा तालिम प्रति अपेक्षा बारे विवरण उल्लेख गर्नु पर्नेछ। फार्मासिस्ट र सहायक फार्मासिस्ट दुवैको समान सहभागिता सुनिश्चित गरिने काउन्सिलले जनाएको छ।

आवेदन गर्दा प्रति उम्मेदवार गैर फिर्ता शुल्क रु. ५०० तोकिएको छ, जुन नेपाल फार्मेसी काउन्सिलको नाममा नबिल बैंक खाता नम्बर १७३०१०१७५००५७३ मा जम्मा गर्नु पर्नेछ।

यो तालिममा जम्मा ५० जना मात्र सहभागी हुने व्यवस्था गरिएको ले छनोट ‘फर्स्ट–कम, फर्स्ट–सर्भ’ आधारमा हुने भएकाले छिट्टै आवेदन दिनेहरूले प्राथमिकता पाउने पाण्डेले बताए ।

अनलाइन पोर्टल training.nepalpharmacycouncil.com मार्फत आवेदन दिन सकिनेछ। आवेदन दिन यो लिङ्कलाई क्लिक गर्नुस्। आवेदन दिने अन्तिम मिति २०२५ सेप्टेम्बर १० तोकिएको छ।

त्यस्तै, काउन्सिलले २०८२/०८३ आर्थिक वर्षका लागि क्षमता अभिवृद्धि तथा व्यावसायिक विकास सम्बन्धी तालिमहरू सञ्चालन गर्न रोस्टर ट्रेनर्सको लागि पनि आवेदन आह्वान गरेको छ। यसको लागि योग्य र अनुभवी विशेषज्ञ/स्रोत व्यक्तिले आवश्यक प्रमाण सहित आफ्नो विवरण पेश गर्नु पर्नेछ। थप जानकारीका लागि नेपाल फार्मेसी काउन्सिल सचिवालयमा सम्पर्क गर्न सकिने जनाइएको छ।