ओबिसेट्रैपिब: हृदयघात र स्ट्रोकको जोखिम घटाउने आशाजनक औषधि

काठमाडौं – विश्वभरका चिकित्सक र वैज्ञानिकहरू को एक टोलीले गरेको नयाँ अनुसन्धानले कोलेस्ट्रोल घटाउने एक नयाँ औषधि ओबिसेट्रैपिब (Obicetrapib) मुटु र मस्तिष्कघात (स्ट्रोक) जस्ता गम्भीर रोगहरू रोक्नमा प्रभावकारी हुन सक्ने संकेत दिएको छ।

यो औषधि दैनिक एकपटक मुख मार्फत सेवन गर्न मिल्ने हुन्छ। वैज्ञानिकहरूको अनुसार, यसले शरीरमा रहेको खराब कोलेस्ट्रोल (एलडिएल) र लाइपोप्रोटिन (ए) लाई उल्लेखनीय रूपमा घटाउने देखिएको छ, जुन दुवै मुटुका रोग र स्ट्रोकका प्रमुख कारण मानिन्छन्।

अन्तर्राष्ट्रिय अनुसन्धानमा ठूला संकेतहरू

अष्ट्रेलियाको मोनाश विश्वविद्यालय अन्तर्गत विक्टोरियन हार्ट इन्स्टिच्युट का वैज्ञानिक प्रोफेसर स्टिफन निकोल्सको नेतृत्वमा गरिएको यो अध्ययन ‘न्यू इङ्गल्याण्ड जर्नल अफ मेडिसिन’  मा प्रकाशित भएको हो। यसमा २५३० मुटुका पुराना बिरामी सहभागी थिए, जसमा केहीमा आनुवंशिक रूपमा कोलेस्ट्रोल उच्च हुने समस्या पनि देखिएको थियो।

अनुसन्धान अनुसार, १२ साता सम्म ओबिसेट्रैपिब सेवन गरेका बिरामीहरूमा:

• एलडिएल कोलेस्ट्रोल ३२.६% ले घटेको पाइएको छ।
• लाइपोप्रोटिन (ए) को मात्रा औसतमा ३३.५% ले कम भएको देखिएको छ

लाइपोप्रोटिन (ए) नियन्त्रणमा पहिलो प्रभावकारी प्रयास

लाइपोप्रोटिन (ए) नियन्त्रण गर्ने कुनै पूर्ण रूपमा स्वीकृत उपचार हाल सम्म उपलब्ध थिएन। यस्तो अवस्थामा ओबिसेट्रैपिबले देखाएको प्रभाव उल्लेखनीय मानिएको छ। यसले विशेष गरी ती बिरामीहरू लाई लाभ पुर्‍याउने अपेक्षा गरिएको छ, जो हाल सम्मका उपचारबाट सन्तोषजनक सुधार पाएका थिएनन्।

सुरक्षित र सहनशील औषधि

अनुसन्धानमा सहभागी बिरामीहरूले ओबिसेट्रैपिबलाई सजिलै सहन सकेको र गम्भीर साइड इफेक्ट नदेखिएको उल्लेख छ। यसले यसलाई सुरक्षित विकल्पको रूपमा प्रस्तुत गर्छ।

विशेषज्ञहरूको निष्कर्ष

प्रो. निकोल्सका अनुसार, ‘धेरै उच्च जोखिममा रहेका बिरामीहरू लक्ष्य अनुसारको कोलेस्ट्रोल स्तरमा पुग्न सक्दैनन्। ओबिसेट्रैपिब उनीहरूका लागि नयाँ विकल्प बन्न सक्छ, विशेषतः  लाइपोप्रोटिन (ए) घटाउने क्षेत्रमा।’

ओबिसेट्रैपिब मुटुरोग र स्ट्रोक जस्ता घातक रोगहरूसँग लड्न नयाँ आशा बनेर आएको छ। यदि आगामी चरणका परीक्षणहरूमा पनि यसले सकारात्मक परिणाम देखायो भने, यो औषधि भविष्यमा कार्डियोभास्कुलर उपचारमा एक ‘गेम चेंजर’ सावित हुन सक्छ।