टेकु अस्पतालमा २४ वर्षीया महिलाको मृत्यु, डेंगी संक्रमणको आशंका

काठमाडौँ – डेंगी संक्रमणको आशंकामा उपचाररत २४ वर्षीया महिलाको शुक्रराज ट्रपिकल तथा सरुवा रोग अस्पताल, टेकुमा निधन भएको छ। इपिडिमियोलोजी तथा रोग नियन्त्रण महाशाखाका अनुसार गत बुधबार उनको मृत्यु भएको हो।

महाशाखाका निर्देशक डा. चन्द्रभाल झा ले शुक्रबार दिउँसो ३:३० बजे नेपालहेल्थप्रेससँग भने, ‘कुनै दीर्घरोगबाट ग्रसित नरहेकी ती युवती लाई डेंगी संक्रमण भएको आशंका गरिएको छ। तर पुष्टि परीक्षणको रिपोर्ट शुक्रबार साँझ सम्म मात्र आउने भएकाले अहिल्यै निश्चित रुपमा डेंगी कै कारण मृत्यु भएको हो कि अन्य कारणले भन्न सकिँदैन।’ अस्पतालका चिकित्सकहरूका अनुसार उपचारको क्रममा ती महिलामा दौरा (सिजर) समेत देखिएको थियो।

स्वास्थ्य तथ्याङ्क अनुसार सन् २०१५ जनवरी देखि हाल सम्म मुलुकका ७४ जिल्लामा २,९८४ जनामा डेंगी संक्रमण पुष्टि भइसकेको छ। पछिल्लो एक सातामै १६८ नयाँ संक्रमित थपिएका छन्। विज्ञहरूका अनुसार करिब ९० प्रतिशत संक्रमितमा कुनै लक्षण नदेखिने भएकाले वास्तविक संक्रमित संख्या यसभन्दा धेरै बढी हुन सक्छ ।